Le Colline Storiche.Le Colline Eroiche. Non solo Prosecco.

Ve seo mai domandadi parché i ghe ciama “Colline Eroiche?” ale colline de Conejan e Valdobbiadene? Par capirlo ben bisognaria far un salt quassù, magari partendo daCONEJAN passar par AL FELETAN e dopo zò fin a PIEVE DE SOLIGO e rivar fin a VALDOBBIADENE L’ocio al se perde in mezo al verde inte stò periodo estivo.I rasp de ua i è bei grandi e i promete na vendema de quele storiche. Mi che vegne daa campagna son bituà a vederle in orizzontal le vide, ben alineade, dove che col trator o qualsiasi altro mezzo meccanico un pol andar dentro e fora a oci seradi. A vardar i vigneti rampegadi su par che le rive un se domanda come che i fa i contadin a tajar l’erba (A MAN) a zarpir (A MAN) a sbambolar (A MAN) e a vendemar (A MAN COA SECIA E LIGADI COE CORDE PAR NO SBRISSAR). Se ve fe un bel girett da ste parti deghe na bea ociada ale vide e vardè ben come e dove che le è impiantade. Solche rivar da dabass a inzima ghe vol un bravo in montagna, penseve a lavorar… No vui zontar altro. Spunti par rifletter sui discorsi che a volte se sente in giro. Tirè vojaltri le vostre conclusion. E se no vè voja de andar lassù a bever n’ombra de vin bon, se se massa pigri par mover al cul daa carega, ve iute mi co ste do, tre foto (copyright pio dal cin 2020)